Туймазы районының Серафимовка ауылында Мәҙинә Тимербаева үҙ ихатаһында музей ойоштора.
#миллипроект #нацпроект #национальныепроектыБашкортостан
Мәҙәни мираҫты һаҡлау, шәхси музейҙар асыу “Ғаилә” милли проектының “Ғаилә өсөн мәҙәниәт” федераль проектын тормошҡа ашырыуға булышлыҡ итә, тип хәбәр итә Туймазы районы хакимиәтенең мәғлүмәт-аналитика бүлеге.
Музейҙа беҙҙең атай-әсәйҙәр, олатай-өләсәйҙәр йәшәгән йорттоң интерьеры булдырылған. Сигелгән мендәрҙәр, һуғылған балаҫтар, тимер карауат, сағыу ашъяулыҡ, етен таҫтамалдар, СССР заманындағы һауыт-һаба... Мөйөштә Мәҙинә ханымдың олатаһы үҙ ҡулдары менән эшләгән буфет урын алған. Төп экспонаттарҙың береһе – 1962 йылда, хужабикәнең тыуған көнөндә атаһы һатып алған самауыр.
– Боронғо әйберҙәргә һәр саҡ иғтибарлы инем. Атай-әсәйемдең өйөндә һәр снтиметрҙа раритет булғанын күреп, ихатала музей ойошторорға булдым, – ти Мәҙинә Тимербаева.
Күршеләре, таныштары ла музейҙы тулыландырырға ярҙам итә. Көндәр йылытҡас, бында бигерәк күңелле булыр, тип уйҙары менән бүлешә хужабикә.
Фото һәм сығанаҡ – https://contenta.info/press_releases/920211#scroll.