Утлы осҡон бейетә...

Бер көн эсендә йөҙәрләгән ҡатмарлы конструкцияларҙы, тимер деталдәрҙе тоташтырып, конвейерға оҙатып ҡына өлгөр. Заводта эш етеҙлек, оҫталыҡ, тағы сәләмәтлек талап итә. Ҡәтғи план ҡуйылған, һәр секунд иҫәпле. Автобустар, автосамосвалдар, троллейбустар, ауыл хужалығы техникаһы һәм запас частар етештергән был завод тотош Рәсәйгә билдәле. 2011 йылда улар, сит ил компанияһы менән берлектә, беренсе Рәсәй электробустарын да сығара башлай. Быны мин эштең ҡеүәтен билдәләр өсөн яҙам. Ошондағы оҫталар тонна-тонна тимерҙән матур, кәрәкле әйбер ҡоя һәм ҡора. Металды иретеп йәбештереү өсөн физик көс һәм ныҡлыҡ ҡына түгел, ә тойомлау һәләте лә, нескәлек тә, күҙ үткерлеге лә, ҡул тилберлеге лә мөһим. Тап бына ошонда көс түгә лә инде Рушаниә Мөстәҡим ҡыҙы Рәхмәтуллина. Ул дымлы маңлайын еңе менән генә һөртә лә, тимер битлеген йәнә йөҙөнә төшөрөп, эшенә тотоноуы була, ян-яҡҡа фонтандай утлы осҡондар оса башлай...

«Сығышым менән Ырымбур өлкәһенең Тирис-Усман ауылынан. Тәүҙә ашнаҡсыға уҡырға уйлай инем. Әммә һуңынан сварщик һөнәрен һайланым. Бында, Нефтекамала, апайым йәшәгәс, 139-сы училищеға иретеп йәбештереүсегә барырға хәл иттем. Ата-әсәйем дә, ябай эшселәр, теләгемә ҡаршы булманы. «НефАз»ға практика үтергә килгәйнем, ҡалдым да ҡуйҙым. Ҡурҡманым, сөнки тәжрибәле остаздар тура килде, – тип һөйләй ҡатын. – Ирем Илдар Мәҡсүт улы ла ошо заводта эшләй, ул автобустарҙы буяу цехында деталдәр ташыу өсөн яуаплы».

Заводтың 2-се йыйыу һәм иретеп йәбештереү цехында Рушаниә Мөстәҡим ҡыҙына ирҙәрҙән торған электросварщиктар бригадаһын етәкләүҙе лә ышанып тапшырғандар. Ир-аттарҙы тыңлатыу өсөн дә бит улар һоҡланырлыҡ оҫта булырға тейешһең.

«Оҙаҡ йылдар автозаводта эшләүем менән ғорурланам. Тәү сиратта хәүефһеҙлек ҡағиҙәләрен үтәү, йыйнаҡлыҡ, иғтибар мөһим минең эштә. Аҙ ғына яңылышыу ҙа фажиғәгә, яман эҙемтәләргә килтереүе ихтимал. Иретеп йәбештереү сәнғәт кеүек – эш процесы оҡшай. Электросварщик һөнәре үҫешәсәк, тип уйлайым. Хәҙер, әлбиттә, заводтарҙа роботтар, махсус ҡорамалдар индерелә, йыл һайын нимәлер яҡшы яҡҡа үҙгәрә, яңыра. Әммә бөтә хеҙмәттә лә робот кешене алмаштыра алмаясаҡ», – ти ул.

Альбина Ғөбәйҙуллина