Йәшен атыу арҡаһында күп балалы ғаилә өйһөҙ ҡалған

“Донъяны яңғыратып күк күкрәне, йәшен, көслө дөбөрҙәп килеп, өйҙө ике тапҡыр атты”, – тип һөйләй шаһиттар. Был мәлдә өйҙә берәү ҙә булмай. Янғын һүндереүселәрҙе күршеләре саҡыра.

Ғаиләнең бөтә әйберҙәре, йыһазы, техникаһы, документтары көлгә әйләнә.

“Хужалар – ауырлыҡтар аша үтеп, үҙ көстәре менән тырышып-тырмашып донъя ҡорған, матур күңелле йәштәр”, – тип билдәләй ауылдаштары. Йортто әсәлек капиталына һатып алалар. Уға төкәтмә төҙөйҙәр, ремонт яһайҙар.

Ғаиләлә өс, алты, ун өс йәшлек сабыйҙар үҫә. Ҡаза килгән саҡта бәләкәстәре балалар баҡсаһында була. Ә 13 йәшлеге эштән ҡайтып килеүсе ата-әсәһе менән юлда була.

“Янғын сығырға бер ай ҡала бесәйебеҙ юғалды, техникабыҙ ватылды, бәлә килерен иҫкәртергә теләгәндәй, этебеҙ гел олоно”, – тип һөйләй хужалар.

Ғаилә әле район үҙәгендә – Раевка ауылындағы туғандарында ваҡытлыса урынлашҡан. Ошо мәлдә миһырбанлы райондаштары оло ҡаза күреүселәргә булышлыҡ итеү сараһын күрә. Битараф булмаған кешеләр уларға хәлдәренән килгән тиклем ярҙам ҡулы һуҙа ала (КАРТА СБЕРБАНК: 2202200674787831 Салимгареева Эльзира Ирековна).

Фото социаль селтәрҙән алынды.