Балағыҙҙың һүрәтен конкурсҡа ебәрегеҙ!

Башҡортостанда йәшәүсе малайҙар һәм ҡыҙҙар өсөн “Мин прививканан ҡурҡмайым – коронавирусҡа ҡаршы көрәшәм!” тигән балалар һүрәттәре конкурсы бара. Ижади бәйге Халыҡ-ара балаларҙы яҡлау көнөнә арнала. Уны Башҡортостан Һаулыҡ һаҡлау министрлығы ярҙамында Республика балалар клиник дауаханаһы ойоштора.

Конкурс өс йәш категорияһы буйынса уҙғарыла: мәктәпкәсә йәштәгеләр (баланың һәм ата-әсәнең берлектәге ижады), 1-4-се класс һәм 5-7-се класс уҡыусылары араһында.

Конкурста ҡатнашыу өсөн 30 майға тиклем [email protected] почтаһына “Мин прививканан ҡурҡмайым – коронавирусҡа ҡаршы көрәшәм!” тигән яҙма менән эштәрҙе һәм ғариза ебәрергә кәрәк. Һүрәттәр теләһә ниндәй форматта (IPG, PDF) булһа ла ярай. Уларҙың яҡшы сифатта (аныҡ), быға тиклем күргәҙмәләргә ҡуйылмаған, башҡа конкурстарҙа ҡатнашмаған, бүтән сығанаҡтарҙан үҙләштерелмәгән булыуы зарур, тип билдәләй Башҡортостан Һаулыҡ һаҡлау министрлығының матбуғат хеҙмәте.

Һәр категория һәм номинация буйынса еңеүселәр дипломдар һәм иҫтәлекле бүләктәргә лайыҡ буласаҡ. Ҡалған бәйгеселәр ҡатнашыусы сертификаты аласаҡ.

Фото БР Һаулыҡ һаҡлау министрлығы сайтынан алынды.