Һөрөм еҫе ҡайҙан килә?

Һуңғы көндәрҙә берҙәм дежур-диспетчер хеҙмәтенә һауаны төтөн ҡаплап алыуы тураһында мөрәжәғәттәр йышайған. Ундай шылтыратыуҙар Белорет, Учалы, Әбйәлил райондарынан килә икән.

Республиканың Ғәҙәттән тыш хәлдәр хеҙмәтенән хәбәр итеүҙәренсә, атап үтелгән райондар биләмәләрендә һауа разведкаһы үткәрелгән. Урман яныу осраҡтары асыҡланмаған. Белгестәрҙең фаразлауҙарына ярашлы, төтөн күрше төбәктән килеүе ихтимал. Баҡһаң, Урал федераль округка ҡараған өлкәләрҙә күпләп урман яна. Йәмғеһе ут 150 мең гектар ерҙә теркәлгән.

Ғәҙәттән тыш хәлдәр хеҙмәте смог ваҡытында еүеш марля битлектәр менән файҙаланырға, күберәк һыу, йәшел сәй эсергә, ҡойонорға тәҡдим итә. Бындай ваҡытта тәҙрәләрҙе ябыҡ тотоу хәйерле.