-15 °С
Болотло
Антитеррор
Бөтә яңылыҡтар
Новости
20 Апрель 2021, 14:27

Мортаҙа мәҙәктәре

Дәүләтбикә ҡапҡаңды асМортаҙа ҡартатайҙың хәләл ефете - Дәүләтбикә өләсәй. Уларҙың йорто колхоз идаралығы ҡаршыһында ине. Бер көнө ул хужалыҡ рәйесенең дәүләткә иген тапшырырға кәрәк тигән һүҙҙәрен ишетеп ҡала ла, өләсәйгә ҡысҡыра:- Дәүләтбикә ҡапҡаңды ас, хәҙер һиңә колхоз иген тапшыра, - ти икәнӘсәйемдең ҡартатаһы Мортаҙа Ҡоланбаев Баймаҡ районы Таулыҡай ауылында йәшәне. Ғаиләһен кулак мөһөрө менән һөргөнгә ебәргәндәр, малайҙың күҙенә аҡ һалыу арҡаһында ғына ул был афәттән ҡотолоп ҡалған. Һуңынан ауылдың уҡымышлы муллаһы булып китеп, йор һүҙле аҡһаҡал, хәләл ефетенән ҡалып, бик оҙон ғүмер йәшәне, балаларының балаларын, ейәндәрен, бүлә-бүләсәрҙәрен күреп, баҡыйлыҡҡа күсте.Уның йор һүҙлелеге хаҡында ауылда әле лә легендалар йөрөй. Кешеләр Мортаҙа ҡарттың әйткәнен бер-береһенә лаҡап итеп һөйләй. Шуларҙың бер нисәүһен тәҡдим итәм.

Атҡанын ишетмәнем
Дәүләтбикә әбей, тыштан ингән ире Мортаҙаға:
- Мортаҙа, таң атҡанмы?- тип һорай икән
- Әллә, атҡанын ишетмәнем,- ти икән тегеһе
Тотолһа урламаһын
Йәнә Дәүләтбикә әбей:
-Мортаҙа бөгөн ай тотолған икән, - ти.
- Һуң, тотолһа, урламаһын,- тигән бабайы.
Урман тулы Абдулла
Мортаҙа ҡарт атына ултырып, һәлмәк кенә бесәнгә китеп бара. Бара биргәс, уны иҫке генә матайында дырылдатып ауылдың Абдулла тигән кешеһе үтеп китә. Үтеп китә лә, бының матайы боҙола. Юлда торған Абдулланы, Мортаҙа ҡарт ҡыуып етеп, аты менән ары китә.
Әҙерәк бара биргәс, матайын йүнәтеп алған Абдулла тағы алға елдерә. Шулай бер нисә тапҡыр ҡабатлана. Инде Абдулла бесәнселәрҙе йәнә лә берҙе үтеп киткәс, Мортаҙа ҡарт ғәжәпләнгән кеше булып:
-Ай- һай, бөгөн урман тулы Абдулла икән,- тигән булған.
Кешеләр аша ҡарап тора
Кешеләрҙең бесәндән ҡайтҡанын күҙәтеп торған Мортаҙа ҡарт:
- Хәҙер кеше үҫкән дә киткән, бесәндән аша ҡарап тора, - ти икән.
Был иһә ҡарттың элек кеше, ең һыҙғанып эшләп, бесәнде кәбәне менән ташыһа, хәҙер яҙа-йоҙа тейәп ҡайтыуына ишаралаған һүҙе икән.
Фото kurultаy- ufa.ru сайтынан алынды.
Автор:Гөлнур Ишбулатова
Читайте нас в