Дим дауаханаһы ковид-госпиталь булыуҙан туҡтаны

Өфө ҡалаһының Дим биҫтәһендәге дауахана коронавирус менән ауырыусыларҙы ҡабул итеүҙе тамамланы. Был турала Хөкүмәттең бөгөнгө оператив кәңәшмәһендә вице-премьер – һаулыҡ һаҡлау министры Максим Забелин белдерҙе. “Дауахана планлы эшкә күсергә йыйына”, – тип билдәләне ул.

Башҡортостан Башлығы Радий Хәбиров Дим дауаханаһының тәүгеләрҙән булып ковид-госпиталь итеп үҙгәртелеүен хәтергә төшөрөп китте.

“Бөтә хеҙмәткәрҙәргә, барлыҡ коллективҡа ҙур рәхмәт һүҙҙәре еткерәм. Һеҙҙең аша бик күп ковид-ауырыуҙар үтте, уларға һеҙ ваҡытында һәм квалификациялы ярҙам күрһәттегеҙ”, – тине Радий Хәбиров.

Республикала йоғошло ауырыуҙар өсөн госпиталь итеп үҙгәртелгән дауаханалар яйлап ҡәҙимге эш форматына күсерелә. Әле ковид-ауырыуҙар өсөн тәғәйен койкалар – 1 668, шуларҙың 10 проценты буш.

Фото "Башинформ"дан алынды.