Бөгөн Башҡортостан Ҡатын-ҡыҙҙар союзы әүҙем йәмәғәтселәрҙе түңәрәк өҫтәл артында бик йөкмәткеле һөйләшеүгә йыйҙы. Унда ҡатнашыусылар 2017-2022 йылдарға ҡатын-ҡыҙҙар мәнфәғәтендә эш итеүҙең милли стратегияһы республикабыҙҙа нисек тормошҡа ашырылыуын тикшерә. Был документ Рәсәй Федерацияһы Хөкүмәтенең 2019 йылдың 7 декабрендәге ҡарары менән раҫланғайны. Стратегияны булдырыу идеяһы 2015 йылда Санкт-Петербургта үткән Евразия ҡатын-ҡыҙҙар форумында әйтелде. Һәм был башланғыс Рәсәй Президенты Владимир Путин тарафынан хуплап ҡабул ителде.
Ҡатын-ҡыҙҙарҙың һаулығын һаҡлау өсөн шарттар тыуҙырыу, гүзәл заттың иҡтисади хәлен яҡшыртыу, уларҙың һөнәри белем алыуы өсөн мөмкинлектәрҙе киңәйтеү, ҡатын-ҡыҙға ҡарата көс ҡулланыуға ҡаршы саралар күреү, уны ижтимағи-сәйәси тормошта әүҙемерәк ҡатнашыуға йәлеп итеү – түңәрәк өҫтәл артында әлеге мәлдә ошо мәсьәләләр буйынса йәнле фекер алышыуҙар бара. Улар Стратегияны тормошҡа ашырыуҙың төп йүнәлештәре булып тора.