Вирус зәһәрлеген күрһәтеп ҡалырға тырыша

Коронавирус, көсө кәмеүен тойоп, бөтә яһиллығын күрһәтеп ҡалырға ынтыла. Һуңғы тәүлектә сир тағы дүрт яҡташыбыҙҙың ғүмерен алып киткән. Республикала COVID-19 инфекцияһынан вафат булыусылар 245-кә еткән.

Һуңғы мәғлүмәттәргә ярашлы, Башҡортостанда коронавирус йоҡтороусыларҙың дөйөм һаны – 27 298. Тәүлек эсендә сир 152 ауырыуҙа табылған.

Әле стационарҙарҙа COVID-19 менән сирләүсе 280 кеше ята, 21-е ауыр хәлдә, алтауһын табиптар яһалма һулыш аппаратына тоташтырған. Амбулатор шарттарҙа дауаланыусылар – 5 101.

Кисәле-бөгөнлө, зәһәр инфекциянан ҡотолоп, дауахананан сығыусылар – 241. Пандемия башынан бирле 21 672 кеше сирҙе еңеүгә өлгәшкән.

Тәүлек эсендә үпкә ялҡынһыныуы диагнозы 145 сырхауға ҡуйылған, унан сәләмәтләнеүселәр – 97.