Балаларҙың теше һау булһын тип

Баймаҡ ҡалаһының 2-се мәктәбендә бөтә диагностика һәм дауалау ҡорамалдары менән йыһазландырылған заманса стоматология кабинеты асылды. Республика Башлығы Радий Хәбиров былтыр сентябрҙә эш сәфәре менән Баймаҡҡа килгәндә бында мәктәп стоматологияһын асырға ҡушҡайны.

Теш дауалау кабинеты шулай уҡ ҡаланың 4-се лицейында эшләй, тиҙҙән ул Темәс ауылы мәктәбендә лә асыласаҡ.

Мәктәп стоматологияһы кабинеттары – Башҡортостандың Фән һәм мәғариф министрлығы тормошҡа ашырған “Юғарыға ос!” проектының бер өлөшө. Улар бер үк стилдә биҙәлгән, заманса ҡорамалдар менән йыһазландырылған һәм лицензияланған. Проект республикала 61 мәктәпте солғаған һәм ул һан арта бара. Башҡортостан был күрһәткес буйынса Рәсәйҙә алдынғылыҡҡа сыҡҡан.