50-гә яҡын сырхауҙың хәле ауыр

3 декабргә ҡарата Башҡортостанда коронавирус инфекцияһы, дөйөм алғанда, 14 689 ауырыуҙа раҫланған. Тәүлек эсендә сирҙе йоҡтороусылар 141-гә артҡан.

Стационарҙа әлеге ваҡытта 538 сырхау ята. Шуларҙың 48-енең хәле ауыр, тип билдәләй табиптар. Улар 12 ауырыуҙы яһалма һулыш аппаратына тоташтырырға мәжбүр булған. Амбулатор дауаланыусылар – 1 854.

Аҙаҡҡы тәүлектә 71 кеше, вирусты еңеп, дауахананан сыҡҡан. Йәмғеһе 12 211 яҡташыбыҙ һауығыуға өлгәшкән.

Уҙған тәүлектә коронавирустан йәнә бер үлем осрағы теркәлгән. Республикала был шәфҡәтһеҙ инфекциянан вафат булыусылар хәҙер – 86.

Дауахананан тыш пневмония менән кисә һәм бөгөн 405 кеше ауырыған. Үпкә ялҡынһыныуынан сәләмәтләнеп, стационарҙан өйөнә ҡайтыусылар – 412.