Тағы бер ғүмер һүнгән...

Башҡортостан Һаулыҡ һаҡлау министрлығы COVID-19-ҙан тағы бер яҡташыбыҙ донъя ҡуйыуы хаҡында хәбәр итә. Ул – Дүртөйлө районында йәшәүсе 1952 йылғы ханым. Артыҡ ауырлыҡтан, ике яҡлы нефросклероздан, бронхиаль астманан яфаланыуы уға коронавирусты еңергә кәртә булғандыр, күрәһең. Афәт ҡорбандары республикала 75-кә етте.

Әле 400-гә яҡын, теүәлерәк әйтһәк, 392 ауырыу ковид-госпиталдәрҙә вирусҡа ҡаршы көрәшә. Ауыр хәлдәгеләрҙең артыуы борсолоу тыуҙыра. Йома улар 36 ине, хәҙер 39 булып киткәндәр. Яһалма һулыш аппараты ярҙамында тын алыусылар ҙа күбәйгән – 14. Амбулатор дауа алыусылар – 1 298.

Кисәле-бөгөнлө, коронавирустан һауығып, дауахананан өйөнә ҡайтыусылар – 14. Пандемия башлағандан бирле инфекциянан 11 422 кеше сәләмәтләнгән.

Үпкә ялҡынһыныуы үткән тәүлектә 379 сырхауҙы аяҡтан йыҡҡан. Был сирҙән ҡотолоп, дауахананан сығыусылар кисә һәм бөгөн 401 булған.