Барҙы башҡорттары ҡорға йыйыла

Барҙа ауылының "Дуҫлыҡ" паркында ғәйнә башҡорттарының арҙаҡлы шәхесе, Ғәйнә волосы старшинаһы, беренсе депутат Туҡтамыш Ишбулатовҡа бюст һәм шәжәрә ағасын асыу тантанаһы була. Скульптураның авторы – Башҡортостандың атҡаҙанған мәҙәниәт эшмәкәре Өлфәт Ҡобағошов.

"Пермь крайы башҡорттары: тарих, тел һәм мәҙәниәт" тигән сара бер түңәрәк өҫтәл артына Башҡортостан һәм Пермь крайының тарихсы-ғалимдарын, крайҙы өйрәнеүселәрҙе, тарих уҡытыусыларын йыя. Унда шулай уҡ ике яҡтың да юғары кимәлдәге етәкселәренең ҡатнашыуы көтөлә.

Сираттағы сара яҡтарҙың эшлекле даирәләренә тәғәйенләнгән. Бизнес-ҡоролтайҙы Бөтә донъя башҡорттары ҡоролтайының эшҡыуарлыҡ комиссияһы үткәрә. Унда һүҙ ауыл хужалығы һәм туристик бизнес алып барыу хаҡында барасаҡ.