"Сирләүселәр араһында өлкәндәр артыуына борсолам"

Әңгәмәлә республика етәксеһе коронавирус менән сирләүселәр араһында өлкәндәрҙең артыуына ныҡ борсолоуын белдерҙе. Уның әйтеүенсә, Башҡортостанда 70 йәште уҙған 300-ҙән ашыу кешелә COVID-19 вирусы табылған. Өләсәйҙәр һәм олатайҙар был сирҙе ауыр үткәрә. Дауаханаларҙа әле яһалма һулыш аппаратына тоташтырылған 44 ауырыуҙың күбеһе – ололар.

Радий Фәрит улы коронавирус йоҡтороу ҡурҡынысы кәмегәнсе пенсионерҙарҙы үҙизоляция режимын күҙәтергә, һаҡлыҡ сараларын үтәргә саҡырҙы, тағы ла ике-өс аҙна сабыр итеүҙәрен һораны.

Хәбиров шулай уҡ волонтерҙарҙың мохтаж өлкән йәшгеләргә булышлыҡ итеүе туҡтатылмауын әйтеп үтте. Республикала 110 меңдән ашыу аҙыҡ-түлек йыйылмалары таратылған. Ирекмәндәр шылтыратыусыларҙың бөтәһенә лә ярҙамға килергә әҙер. Тик өлкәндәрҙең дә, үҙ сиратында яуаплылыҡ алып, коронавирус менән сирләү хәүефен кәметеүе мөһим. Республика Башлығы уларҙың йәмәғәт транспортынан файҙаланмаҫҡа тырышыуын, халыҡ күп урындарҙа йөрөмәүен үтенде.

Осрашыуҙа ҡатнашыусылар шулай уҡ “һуғыш балаларына” ярҙам итеү, өлкәндәрҙең ялын ойоштороу, йәштәрҙе илһөйәрлек рухында тәрбиәләү, Бөйөк Ватан һуғышы батырҙары һәм ветерандары хаҡындағы иҫтәлекте һаҡлау, Өлкәндәр өсөн халыҡ университеттары программаларын артабан үҫтереү тураһында ла һүҙ алып барҙы.