Миңлеғәле Шайморатов иҫтәлегенә автосәйәхәт

29 майҙа Ҡырмыҫҡалы районының Шайморат ауылынан Изварин сик пунктына (Луганск халыҡ республикаһы) старт алған автосәйәхәт дауам итә.

Был сара 112-се Башҡорт атлы дивизияһы командиры Миңлеғәле Шайморатов иҫтәлегенә бағышланған. Маҡсаты – дивизия байраҡтарының күсермәләрен, Луганск өлкәһендәге мемориалға индереү өсөн ошо ерҙә һәләк булған һалдаттарҙың исем-шәрифтәрен, аллеяға ултыртыу өсөн кедр үҫентеләрен тапшырыу.

Автосәйәхәт үткәреү башланғысында яҙыусы, журналист, “Ҡаҡшамаҫ һәм легендар 112-се...” (“Несокрушимая и легендарная 112-я…”) китабы авторы Борис Малородов, Башҡортостандың Дәүләт Йыйылышы – Ҡоролтай депутаты Салауат Харрасов, “Аҡтау” социаль адаптация үҙәге, “Төнгө бүреләр” байкерҙар клубы тора.

Сарала ҡатнашыусылар юл ыңғайы Һарытау өлкәһенең Хвалынск ҡалаһында туҡтап киткән. Унда 112-се Башҡорт атлы дивизияһынының берҙән-бер иҫән ҡалған яугире, Советтар Союзы Геройы, 97 йәшлек Георгий Федорович Платонов йәшәй. Ул һуғышта 62-се полкка етәкселек иткән.

Автоуҙышта ҡатнашыусылар Георий Федоровичҡа генерал Шайморатовҡа “Рәсәй Геройы” исеме бирелеүе тураһында хәбәрҙе еткергән.

– Ниһайәт биргәндәр икән, беҙ быны бик оҙаҡ көттөк, - тип шатланған герой.

Әйткәндәй, Г. Ф. Платоновтың исеме башҡа батырҙарҙың исемдәре менән бер рәттән, Башҡортостандың Милли музейында урынлашҡан мемориаль таҡтаташта алтын хәрефтәр менән яҙылған, унда 112-се Башҡорт атлы дивизияһының барлыҡ Советтар Союзы Геройҙары теркәлгән. Ошондай уҡ таҡтаташ 112-се (16-сы гвардия) Башҡорт атлы дивизияһы музейында ла бар.