Һуңғы ҡыңғырау онлайн режимда

Бөгөн сығарылыш класы уҡыусылары өсөн һуңғы ҡыңғырау онлайн режимда яңғыраны. Бындай сара коронавирус таралыу ихтималлығын иҫкәртеү маҡсатында ҡабул ителде тип белдерҙе республика башлығы хөкүмәттә үткән оператив кәңәшмәлә.

-Уҡыусылар өсөн уҡыу йылы тамамлана. Һуңғы ҡыңғырау онлайн режимда үтә. Ләкин был ваҡиғаны һуңынан йыйылып билдәләү, саралар үткәреү булмаясаҡ. Ошо турала алдан һөйләштек. Уға мәктәп директорҙары шәхсән яуаплы буласаҡ,- тине Радий Хәбиров.

“Һуңғы ҡыңғырау” көнө сауҙа нөктәләрендә спиртлы эсемлектәр һатыу ҙа тыйылды.

Хөкүмәт кәңәшмәһендә шулай уҡ юғары уҡыу йорттары һәм колледж ятаҡтарындағы санитар-эпидемиологик талаптарҙы күҙәтеү саралары хаҡында ла һүҙ булды. Хөкүмәт премьер - министры урынбаҫары Фәнүр Йәғәфәров билдәләүенсә, ятаҡтарҙа 5 меңдән ашыу кеше йәшәй, шуларҙың 3 479 - студенттар. Бөгөнгө көндә коронавирус йоҡторған студенттар БДУ ятағында теркәлгән, улар дауаханала. Башҡалар өсөн саралар күрелгән, ятаҡтарҙа дезинфекция үткәрелгән.