Рухиәт байрамы

#домаяҡшыраҡ

Диктант яҙыуға 95 меңгә яҡын кеше теркәү үткән ине. Уҙған йыл менән сағыштырғанда был байтаҡҡа күберәк. Юғары әүҙемлек күптәрҙең өйҙә, үҙҡурсаланыу көндәрендә ултырыуы һәм кешеләрҙең яуаплылығы артыуы менән бәйлелер, ти белгестәр. Сараны Башҡортостан юлдаш каналында тура эфир барышында йә диктанттың рәсми сайтында яҙырға мөмкин ине. Ул өс йүнәлештә - телде башлап өйрәнеүселәр, яҡшы белеүселәр һәм тәүге тапҡыр төньяҡ-көнбайыш диалектында ойошторолдо.

Башлап өйрәнеүселәр өсөн - йәш музыкант Заһир Зәйнетдин, яҡшы белеүселәр өсөн танылған дикторыбыҙ Флүрә Мурзина һәм төньяҡ-көнбайыш диалекты өсөн билдәле сатирик Марсель Сәлимов уҡыны. Социаль селтәрҙәрҙә диктант яҙыусылар текстарҙың эстәлеге, ҡатмарлығы хаҡында үҙ фекерҙәре менән бүлешә. Респонденттар, тәүге текст телде башлап өйрәнеүселәр өсөн ярайһы ғына ауыр, әммә Заһир Зәйнетдин уны бик ихлас, тасуири итеп уҡыны тип билдәләне. Был сара беҙҙе туплай, берләштерә һәм дуҫлаштыра тигән фекерҙәр ҙә булды. Танылған дикторыбыҙ Флүрә Мурзина беҙҙең журналға үҙ тәьҫораттары менән бүлеште:

-Тура эфирҙа эшләп өйрәнһәм дә, башта бик тулҡынландым. Ләкин ошондай бурысты миңә ышанып тапшырғандары өсөн ғорурмын. Былтыр аудиторияла диктант уҡыусы, Башҡортостандың халыҡ артисы Хөрмәт Үтәшев менән кәңәшләштем, уның әйткәндәренә ҡолаҡ һалдым. Кисә, йәғни 24 апрел,ь генераль репетиция үткәрҙек. Бөтә скайптарҙы, эфирға сығыу ҡоролмаларын тикшерҙеләр. Марсель ағай Сәлимов үҙен бик ышаныслы тотто, Зәйнетдин дә - етди егет, тырышып әҙерләнгән. Уны йәштәр бик ярата, шуға кумирҙарына ҡушылып өйҙә диктант яҙғандарҙыр, тип ышанғы килә. Мин бөгөнгө көндән ҡәнәғәтмен.

Диктант яҙыуға тәҡдим ителгән текстарға килгәндә, уларҙың барыһы ла башҡорт атлыларының яуҙағы батырлыҡтарын бәйән итте. Унда кавалеристар менән бәйле ваҡиғалар, күптән түгел Герой Йондоҙо алған әйле башҡорто, легендар шәхес, генерал Миңлеғәле Шайморатовтың тиңһеҙ батырлығына тағы бер ҡабат әйләнеп ҡайттыҡ. Еңеүҙең 75 йыллығы яҡынлашҡанда был бик актуаль булды.

Диктантты Рәсәй төбәктәре, яҡын һәм алыҫ сит илдәрҙә йәшәүсе милләттәштәребеҙ ҙә ихлас яҙҙы. Тура бәйләнешкә Америка Ҡушма штаттары, Төркиәнән, Һамар башҡорттары, Санкт-Петербургта йәшәүсе яҡташтарыбыҙ сыҡты. Башҡаларҙы иһә онлайн режимда күҙәтергә мөмкин ине.

Диктанттарҙы интернет мәғлүмәт-телекоммуникация селтәре аша яҙған ҡатнашыусыларҙың эштәре https://bashkdictant.ru/ сайтындағы шәхси кабинет аша ҡабул ителә. Шулай уҡ яҙма эштәрҙең фотоһын, сканер вариантын [email protected] электрон почтаһына,+7(927)950-02-66 Whatsapp мессенджер номерына 2020 йылдың 26 апреленә 23:59 сәғәткә тиклем ебәрергә мөмкин.

Тарихи мәлде һәр кем фотоға төшөрөп #башдиктант2020 хештегы менән социаль селтәрҙәргә һала ала.