Вирус сирлеләрҙе, ололарҙы һағалай

“Пандемия башланғандан алып республикала коронавирус инфекцияһынан 14 кеше донъя ҡуйҙы. Уларҙың күбеһе – 64 проценты – 60 йәштән өлкәнерәк. Барыһының да ауыр төп сирҙәре бар ине: һуңғы стадиялағы онкология, шәкәр диабеты, йөрәк ишемияһы һәм башҡа ауырыуҙар...” – тип һөйләне һаулыҡ һаҡлау министры урынбаҫары Ирина Кононова.

Башҡортостанда коронавирус диагнозы йәмғеһе 371 кешелә раҫланған, һуңғы тәүлектә сир тағы 22 кешелә табылған. Һауығыусылар һаны артып, бөтәһе 34-кә етеүе, тәүлек эсендә донъя ҡуйыусылар булмауы күңелгә йылы өҫтәгәндәй итә. Һәм йөрәктән йәнә һәм йәнә бер үк теләк урғылып сыға: ошо ҡатмарлы ла, шәфҡәтһеҙ ҙә һынауҙы бергәләшеп, имен-аман үтәйек, яҡындарыбыҙҙы һәм үҙебеҙҙе нығыраҡ һаҡлайыҡ!