Башҡорт теле көнө һәм Башҡорт теле йылы

Республика Башлығы Радий Хәбиров үҙенең Указы менән 14 декабрҙе “Башҡорт теле көнө" тип иғлан иткәйне. Үткән шәмбелә ул тәүге тапҡыр республикала киң билдәләнде. Өфөлә Аҡмулла исемендәге Башҡорт дәүләт педагогия университетында башҡорт теле һәм әҙәбиәтенән республика асыҡ дәресе, «МЕГА», «УЛЬТРА», «Үҙәк» сауҙа һәм сауҙа-сервис комплекстарында төрлө саралар уҙҙы. Бай программа көн аҙағында «Башҡортостан» дәүләт концерт залында «Байыҡ-2019» гала-концерты менән тамамланды.

Башҡорт теле көнө сиктәрендә Радий Хәбиров Бөтә донъя башҡорттары ҡоролтайы президиумы ағзалары һәм республика район-ҡалалары ҡоролтайҙары рәйестәре менән осрашты. “Туған телде республикала өйрәнеүҙән тыш, уны Башҡортостандан ситтә лә үҫтереү зарур. Башҡорт теле республика сиктәренән сыҡһын,матур, тәрән аҡыллы башҡорт мәҡәлдәре башҡорт телендә аралашҡан һәр кемдең һүҙлек запасына, рәсәйҙәрҙең ҡулланылышына инһен өсөн беҙгә бергәләп уйларға кәрәк», - тине республика етәксеһе фекер алышыу барышында, мәсьәләгә үҙ ҡарашын белдереп.

Бөтә донъя башҡорттары ҡоролтайы 2020 йылды Башҡорт теле йылы тип иғлан итеү тураһында тәҡдим индерҙе. Ул Радий Фәрит улы яғынан хуплау тапты.