Ҡоролтайға – 30 йыл!

Бөтә донъя башҡорттары ҡоролтайы эшмәкәрлегенең төп аспекттары:

• Ойошманың үҫеш күрһәткестәре:

30 йыл эсендә халыҡ-ара кимәлдә алты съезд үткәрелде, РФ һәм сит илдәр буйынса 100-ҙән ашыу ойошма барлыҡҡа килде. Башҡарма комитет, Президиум, Йәштәр комитеты булдырылды. «Башҡорт халҡының 2030 йылға тиклем үҫеш стратегияһы» ҡабул ителде.

• Тарихи-мәҙәни мираҫты һаҡлау буйынса ғәмәлдәр:

Башҡорт ырыуҙары хәрәкәте: 36 томлы «Башҡорт ырыуҙары тарихы», ырыу биләмәләре карталары баҫтырылды; ырыуҙар гербы һәм гимндары булдырылды; Башҡорт ырыуҙары советы ойошторолдо. Ырыу йыйыны һәм «Бәйге» ярыштары халыҡты бергә туплаусы мәртәбәле сараға әйләнде.

• Хәтерҙе мәңгеләштереү:

Милләтебеҙҙең танылған шәхестәрен халыҡ хәтерендә мәңгеләштереү маҡсатында һуңғы биш йылда ғына Башҡортостанда һәм Рәсәй төбәктәрендә 60-ҡа яҡын һәйкәл һәм бюст ҡуйылды, шул иҫәптән Өфөнөң үҙәк урамдарының береһендә төҙөлгән генерал Миңлеғәли Шайморатов мемориалы.

• Мөһим проекттар:

Ауылдарҙа халҡыбыҙҙың сәләмәт киләсәген хәстәрләгән эсеүгә ҡаршы киң масштаблы «Айыҡ ауыл» проекты уңышлы бойомға ашырыла. Яҙыусылар форумын, башҡорт теле һәм әҙәбиәте уҡытыусылары съезын ойоштороу башланғысында ла башҡорт ҡоролтайы торҙо.

• Гуманитар миссиялар:

Урман янғындарын һүндереүҙә һәм Ырымбур өлкәһендәге ташҡынды бөтөрөүҙә әүҙем ҡатнашты, зыян күреүселәргә ярҙам ойошторҙо.

• МХО-ға ярҙам:

Махсус хәрби операцияла ҡатнашыусыларға кәрәк-яраҡ туплау һәм гуманитар ылауҙарҙы ебәреү даими ойошторола, һалдаттарыбыҙҙың ғаиләләре ҡурсалана. 2025 йыл Ватанды һаҡлаусылар йылы тип иғлан ителде, Башҡортостанда «Йөрәк йылыһы» акцияһы булдырылды.

• «Өлгөлө башҡорт ғаиләһе» конкурсы:

Традицион ғаилә институтын һаҡлауға һәм нығытыуға, шулай уҡ башҡорттоң милли үҙаңын, телен, мәҙәниәтен һәм йолаларын һаҡлауға һәм үҫтереүгә йүнәлтелгән был сара йыл да юғары кимәлдә үткәрелә.

• Мәҙәниәтте, телде һәм спортты үҫтереү:

Башҡорт диаспораһы булған Рәсәй төбәктәрендә генә түгел, ә сит илдәрҙә лә мәҙәни саралар ойоштороуҙа ҡатнаша, «Башҡорт мәҙәниәте һәм мәғарифы көндәре» проектын ғәмәлгә ашыра, Рәсәй төбәктәрендәге киске йәкшәмбе мәктәптәрендә башҡорт теле кластарын асыуға өлгәшә. «Китап байрамы» халыҡ-ара китап йәрминкәһен ойоштороу инешендә торҙо.

«Бәйге» башҡорт күпалыш федерацияһын, «Башҡорт аты» халыҡ-ара фестивален булдырыуға өлөш индерә.

Башҡортостан халыҡтарының милли аш-һыуы һәм мәҙәниәте менән таныштырыу маҡсатында барлыҡҡа килгән «Тәмле. Беҙ бергә» телепроекты, халыҡтың һөйөүен яулап, хатта Бөтә Рәсәй кимәлендә юғары премиялар менән бүләкләнде.

М. Ҡаһарманова.