Нөгөштә йөнтәҫ аяҡлы һар ҡарсығаны күргәндәр

Нөгөш буйында йөнтәҫ аяҡлы һар ҡарсығаны күреп ҡалғандар. Уны ҡышлаусы ҡош, тип тә билдәләйҙәр «Башҡортостан» милли паркында.

Был ҡарсығалар ғаиләһенә ҡараған йыртҡыс ҡоштарҙың яратҡан ризығы – ваҡ кимереүселәр.  Улар сысҡандарҙы эҙләп ер өҫтөндә оҙаҡ әйләнеп оса. Тәүлегенә 30-ға тиклем ваҡ кимереүсене ашай. Йылан итен дә ярата ул.  Тик йыртҡыс ҡоштоң йылан ағыуына иммунитеты юҡ. Әгәр йылан саҡһа, был ҡыйғыр ҡош үлә", – тип һөйләнеләр милли паркта.

Һарҙарҙың 25 төрө билдәле, улар  –  Европа, Азия, Африка һәм Америкала таралған күсмә ҡоштар. Ябай һарҙар ҡатнаш урмандарҙа йәшәй. Ҡанаттары киң, сағыштырмаса ҡыҫҡа. Ҡойроғо ҡыҫҡа, түңәрәкләнгән. Ҡаурыйының өҫкө өлөшө ҡара ҡоңғорт, аҫты ҡыҙғылт-көрән. 

Ә яңыраҡ ҡына  «Башҡортостан» милли паркына күсмә ҡоштар туҡтағайны.