Күршеләр менән бәйләнештәр нығый

Өфөлә барған Рәсәй һәм Ҡаҙағстандың XX төбәк-ара хеҙмәттәшлек форумының пленар ултырышын асыу тантанаһында Радий Хәбиров Ҡаҙағстан Башҡортостан өсөн мөһим партнерҙарының береһе булыуын билдәләне.

"Күп йылдар беҙҙең республиканы һәм Ҡаҙағстан төбәктәрен сауҙа, ауыл хужалығы, сәнәғәт, энергетика, мәғариф һәм һаулыҡ һаҡлау кеүек мөһим өлкәләрҙә тығыҙ хеҙмәттәшлек бәйләй. Был йүнәлештәр былтыр Ҡаҙағстан хөкүмәте менән ҡул ҡуйған Юл картаһына индерелгән. Ҡаҙағстанға республикабыҙ тауар әйләнешенең ундан бер өлөшө тура килә. Был йәһәттән машиналар эшләү һәм нефть химияһы производствоһы төп тармаҡтар булып тора. Мәҫәлән, Башҡортостан предприятиеһы ҡаҙаҡ партнеры менән берлектә Усть-Каменогорскиҙа медицина мебеле һәм ҡорамалдары етештереүҙе ойошторҙо. Йыл аҙағына Белореттан беҙҙең компания Костанайҙа тимер юл вагондары өсөн пружиналар етештереүҙе башларға ниәтләй. Ҡаҙағстан партнерҙары менән берлектә Павлодарҙа химия кластерын булдырыу буйынса инвестиция проектын тормошҡа ашырыу буйынса эш бара», — тине Радий Хәбиров.

Форум сиктәрендә Рәсәй һәм Ҡаҙағстан төбәктәре араһында сауҙа-иҡтисади хеҙмәттәшлек потенциалы, төбәк-ара бәйләнештәрҙе һәм ике илдең сәнәғәт кооперацияһы мөмкинлектәрен киңәйтеү тикшерелә. Форум 20 йыл эсендә ике илдең традицион һәм абруйлы хеҙмәттәшлек майҙансығы статусын алды.