Самбо үҫешенә етди этәргес

16 ноябрҙә Өфөлә «Рәсәй самбо өсөн» форумының пленар ултырышы үтте.

Уның эшендә алдынғы спортсылар һәм тренерҙар, төбәктәрҙең профилле министрлыҡтары һәм ведомстволары етәкселәре, йәмәғәт ойошмалары һәм спорт клубтары вәкилдәре ҡатнашты. Көн тәртибенә Рәсәйҙә спорт көрәшен үҫтереү мәсьәләләре сығарылғайны.

Башҡортостан Башлығы Радий Хәбиров, форумда ҡатнашыусыларҙы сәләмләп, уларға емешле эш теләне.

- Сара республикабыҙҙа самбо үҫешенә етди этәргес бирер, тип ышанам. Был дисциплина менән тағы ла күберәк малайҙар һәм ҡыҙҙар шөғөлләнә башлаясаҡ. Бөгөн «Рәсәй Самбо өсөн» форумы сиктәрендә Өфө ҡабул иткән «Йондоҙ» турнирының яңы Көрәш Һарайында уҙғарылған тәүге ҙур ярыштар булыуы ҡыуаныслы, – тип һыҙыҡ өҫтөнә алды ул.

Төбәк етәксеһе йәштәр араһында спорт көрәшен үҫтереү буйынса көнүҙәк бурыстар хаҡында ла һөйләне. Шуларҙың береһе -квалификациялы педагогик кадрҙар әҙерләү.

Алтай Республикаһы башлығы, төбәк хөкүмәте рәйесе Андрей Турчак, Башҡортостанда спортты үҫтереүгә ҙур иғтибар бүленә, тип билдәләне.

Бөтә Рәсәй самбо көнө менән форумда ҡатнашыусыларҙы Донецк Халыҡ Республикаһы Башлығы Денис Пушилин ҡотланы. Ул үҫеп килгән быуындың ҡиммәттәр системаһын формалаштырыуҙа спорт көрәше ролен юғары баһаланы.

Форумда ҡатнашыусыларға Рәсәй мәғариф министры Сергей Кравцов сәләмләү хаты ебәрҙе. Уны министр урынбаҫары – статс-секретарь Андрей Корнеев уҡып ишеттерҙе.

"Спорт менән шөғөлләнеү дисциплинаны, оператив ҡарарҙар ҡабул итеү, үҙеңдең көслө һәм көсһөҙ яҡтарыңды аңлау һәм уларҙы дөрөҫ файҙаланыу һәләтен үҫтерә. Ошоноң менән бәйле самбо йәш кешене тәрбиәләүсе, уның мәҙәни-әхлаҡи ҡиммәттәргә, сәләмәт һәм хәүефһеҙ йәшәү рәүеше мәҙәниәтенә ихтирам тәрбиәләүсе төп спорт төрҙәренең береһе булып тора, – тип билдәләне сәләмләү хатында Сергей Кравцов.

Форум эшенә йомғаҡ яһап, «Берҙәм Рәсәй» партияһының Генераль советы Секретары вәкәләттәрен ваҡытлыса башҡарыусы, Федерация Советы рәйесенең беренсе урынбаҫары Владимир Якушев, Өфөләге майҙансыҡта яңғыраған тәҡдимдәр һәм ҡабул ителгән ҡарарҙар ил төбәктәрендә самбоны үҫтереү буйынса артабанғы эштең нигеҙенә һалынасаҡ, тип һыҙыҡ өҫтөнә алды.

Олег Яровиков фотоһы.