Республиканың юғары исеменә лайыҡтар

Салауат Юлаев исемендәге дәүләт премияһы лауреаттары исемдәре билдәле булды.

Республика Башлығы Указы менән күренекле әҙәбиәт, сәнғәт һәм архитектура эшмәкәрҙәре Башҡортостан Республикаһының юғары дәүләт премияһын алды.

Архитектура өлкәһендә уға – Өфө хосписын төҙөү проекты өсөн «Башкиргражданпроект» проект институты яуаплылығы сикләнгән йәмғиәте хеҙмәткәрҙәре – генераль директор урынбаҫары, баш архитектор Роберт Александров һәм бүлек начальнигы, 1-се комплекслы оҫтахананың баш белгесе, архитектура төркөмө етәксеһе Марина Завиская, сәнғәт өлкәһендә Рәсәй Геройы, 112-се Башҡорт кавалерия дивизияһы командиры, генерал-майор Миңлеғәле Шайморатовҡа һәйкәл төҙөгәне өсөн Рәсәйҙең халыҡ рәссамы Салауат Щербаков лайыҡ булды.

Шулай уҡ «Төньяҡ Амурҙары» тулы метражлы анимация фильмын төшөргән өсөн дәүләт премияларын «Муха» ЯСЙ директоры Артур Абдрахманов, «Башҡортостан» киностудияһы директоры Юнир Әминев, рәссам-карикатурист Камил Буҙыҡаев алды.