Башҡортостанда республика Башлығын һайлауҙың беренсе көнө тамамланды

Башҡортостанда республика Башлығын һайлауҙың беренсе көнө тамамланды. Сәғәт киске 8-ҙә һайлау участкалары ябылды.

Хәтерегеҙгә төшөрәбеҙ, тауыш биреү тағы ла ике көн, 7 һәм 8 сентябрь дауам итә. Кандидаттар өсөн урындағы ваҡыт буйынса иртәнге сәғәт 8-ҙән киске 8-гә тиклем тауыш бирергә мөмкин.

Һайлауҙы республика Үҙәк һайлау комиссияһы, 69 территориаль һәм 3302 участка комиссияһы, шулай уҡ сәйәси партиялар, йәмәғәт ойошмалары һәм һайлаусылар йыйылыштары тәғәйенләгән 28 меңдән ашыу участка һайлау комиссияһы ағзаһы ойоштора.

Оло йәштәгеләр, инвалидтар, ҡаты сирлеләр, уларҙы ҡараған һәм башҡа етди сәбәптәре булған кешеләр өйҙә тауыш бирә ала. Бының өсөн участка һайлау комиссияһына, шул иҫәптән тауыш биреү көнөндә көндөҙгө сәғәт 2-гә тиклем мөрәжәғәт итергә кәрәк.

Хәтерегеҙгә төшөрәбеҙ, Берҙәм тауыш биреү көнөндә республика халҡы, Башҡортостан Башлығынан тыш, Өфөнөң бер мандатлы 54-се округы буйынса Башҡортостан Дәүләт Йыйылышы депутатын һайлай һәм урындағы үҙидара органдарына 216 һайлау кампанияһында ҡатнаша.

Һайлау кампанияһы осоронда ҡыҙыу линия телефоны эшләй: 8-800-347-54-54.

Әйткәндәй, Башҡортостан һайлаусылары араһында «Рәхмәт» акцияһы ойошторола, 330-ҙан ашыу ҡиммәтле бүләк, шул иҫәптән фатирҙар, автомобилдәр һәм шифаханаларға юлламалар уйнатыла.

Сығанаҡ “Башинформ”