Һайлауҙарҙа байрамса кәйеф

Өфөләге “Башҡортостан Башлығын һайлау – 24” Йәмәғәт матбуғат үҙәгендә һайлау участкаларында эшләгән күҙәтеүсе блогерҙар менән тура бәйләнеш булдырылды.

Баш ҡаланың 144-се һайлау участкаһы урынлашҡан Мостай Кәрим исемендәге 158-се башҡорт гимназияһынан башҡорт теле һәм әҙәбиәте уҡытыусыһы Гөлнара Рамаҙан ҡыҙы Юнысова түбәндәгеләрҙе бәйән итте:   “Беҙҙең һайлау участкаһы һәр ваҡыттағыса алдан етди әҙерлек алып барҙы. Сөнки был һайлау республикабыҙ өсөн иң мөһим ваҡиғаларҙың береһе. Халыҡ та быны бик яҡшы аңлай, шуға күрә ойошҡанлыҡ, әүҙемлек көслө. Бик күп һайлаусыларҙың кәйефе байрамса. Халыҡтың күплегенә ҡарағанда, бөгөн яҡынса 40 процент тирәһе тауыш биргәндер, моғайын.

Шуныһы ҡыуаныслы: башҡортса бюллетень һорап һайлаусылар күп кенә. Милли кейемдә килеүселәр ҙә бар. Виртуоз ҡумыҙсы Миңлеғәфүр Зәйнетдиновтың ғаиләһе йылдағыса матур сығыш яһап, күңелдәргә дәрт-дарман өҫтәп һайлап ҡайтты”.