"Ел моңо" елкендерә

Кисә “Башҡортостан” ДТРК-һының “Рәсәй” медиаүҙәгендә “Ел моңо” фестивален үткәреү айҡанлы матбуғат конференцияһы үтте. Унда мәртәбәле сараның ойоштороусылары: Башҡортостандың халыҡ артисы, Шәйехзада Бабич исемендәге дәүләт йәштәр премияһы лауреаты, Салауат Юлаев ордены кавалеры, бик күп халыҡ-ара конкурстар лауреаты Роберт Юлдашев, билдәле ҡурайсы, фольклорсы, Башҡортостандың халыҡ артисы, С.Юлаев исемендәге дәүләт премияһы лауреаты Юлай Ғәйнетдинов, “Ҡурайсы” төркөмөнөң саунд-продюсеры Сыңғыҙ Юлдашев һәм фестивалдең концерт директоры Регина Агилова журналистарҙың һорауҙарына яуап бирҙе. Билдәле булыуынса, 7-9 августа изге Торатау янында “Ел моңо” тип исемләнгән ҡурай һәм йыр-бейеү фестивале үтәсәк. Виртуоз ҡурайсы Роберт Юлдашев "Ҡурайсы" этно-төркөмө менән Башҡортостанда йәшәүсе төрлө мәҙәниәт вәкилдәре өсөн үҙенсәлекле сара әҙерләй. Асыҡ һауала тәүге тапҡыр үтәсәк был күркәм тамаша – Роберт Нәжип улының бала саҡ хыялы.

"Ел моңо" елкендерә

Ойоштороусылар белдереүенсә, "Ел моңо" фестивале республикабыҙҙың мәҙәни тормошонда ҙур ваҡиға һәм уникаль проекттарҙың береһе булмаҡсы. Өс көн дауамында барған байрам матур тәбиғәт ҡосағында, бушлай уҙа. Беренсе көндә фестивалдә ҡатнашыусылар урманға барып көпшә ҡырҡып, ҡурай эшләргә өйрәнәсәк. Кисен усаҡ янында халҡыбыҙҙың йыр-моңдарына сорналып, талантлы ҡурайсы менән йәнле аралашыу планлаштырылған. Икенсе көндә Роберт Юлдашевтың остазы Юлай Ғәйнетдиновтан ҡурайҙа уйнау буйынса оҫталыҡ дәресе үтәсәк. Шулай уҡ программала төрлө музыкаль инструменттарҙа сығыш яһау, оҙон көй, рус халыҡ йырҙарын башҡарыу, “Урал батыр” эпосын һөйләү ҡаралған. Был көндөң төп бәйгеһе – ҡурайсылар ярышы. Кисен иһә усаҡ янында күңелле “Ритайым” көтә.

Фестивалдең һуңғы көнөндә изге Торатауға менеп, Ҡояшты сәләмләү һәм “Аллаһы Тәғәләгә рәхмәт һәм тыныслыҡ” гимнын башҡарыу көтөлә. Был көндә данлыҡлы көрәшсе, донъя чемпионы Айгиз Зәйнетдинов көрәш ярышы уҙғара. Сәғәт 16.00 фестивалдең Гала-концерты була. Унда Алтай һәм Силәбе өлкәһенән махсус саҡырылған ҡунаҡтар, “Guzal Dance”, “Солнышко” һ.б сығыш яһаясаҡ. Һәм, әлбиттә, Роберт Юлдашев һәм “Ҡурайсы” этно-төркөмө һеҙгә үҙенең иң илаһи ҡурай моңдарын бүләк итәсәк! Урал тауҙарында ғына үҫкән ҡурайҙа уйнауҙы, халҡыбыҙҙың аҫыл хазинаһы, алтын бренды булған милли ҡоралды пропагандалауҙы, уның моңон йәш быуынға еткереүҙе төп маҡсат итеп ҡуйған “Ел моңо” фестивален үткәреүселәргә аҡ юл!