Премьера аншлаг менән үтте

Мәжит Ғафури исемендәге Башҡорт дәүләт академия драма театрында ике көн дауамында күренекле яҙыусы Гөлсирә Ғайсарова-Ғиззәтуллинаның “Яратам, тип әйтеп өлгөрмәнем” хикәйәһе буйынса ҡуйылған кинодрамаһы шаулап-гөрләп барҙы. Яратҡан яҙыусыһын күрергә халыҡ ихластан эркелеп килде. Премьераның тәүге көнөндә Бөтә донъя башҡорттары ҡоролтайы милли әҙәбиәтебеҙ үҫешенә тос өлөш индергәне өсөн Гөлсирә Мирза ҡыҙын «Ал да нур сәс халҡыңа!» миҙалы менән бүләкләне. Кисә иһә, йәғни 24 апрелдә, театрҙың фойеһында Гөлсирә Ғайсарова-Ғиззәтуллина һәм спектаклдең режиссеры Айрат Абушахманов менән матур осрашыу ойошторолдо. Улар уртаҡ ижад емеше хаҡында әҙәбиәт һөйөүселәрҙең һорауҙарына яуап бирҙе, йәнле әңгәмәләште.

Һөйөүҙең мәңгелек доғаһы, йәшәйешебеҙҙең аҫыл асылы булған “Яратам” һүҙен яҡындарыбыҙға әйтеп өлгөрөргә һуңламаһаҡ ине! Ошо фекер кинодраманың нигеҙен тәшкил итә. Бөйөк Еңеүҙең 80 йыллығына арнап сәхнәләштерелгән, күҙ йәштәренә төйөлә-төйөлә ҡарарға мәжбүр иткән премьера, ысынлап та, шәп! Ул – йөрәктәрҙе тетрәндерерлек мөхәббәт, үлсәмдәргә һыймаҫ тоғролоҡ һәм рух көсө хаҡында.