Быйылғы диктант Бөйөк Еңеүҙең 80 йыллығына арнала

26-28 апрелдә башҡорт теленән 11-се Халыҡ-ара диктант уҙғарыла. Быйыл ул Ватанды һаҡлаусыларға, Бөйөк Ватан һуғышында Еңеүҙең 80 йыллығына, тыныслыҡҡа һәм берҙәмлеккә бағышланған. Уның авторҙары – яҙыусы, «Башҡортостан ҡыҙы» республика ҡатын-ҡыҙҙар журналының баш мөхәррире, Башҡортостандың атҡаҙанған матбуғат һәм киң мәғлүмәт саралары хеҙмәткәре Миләүшә Ҡаһарманова һәм шағирә, журналист, Башҡортостандың атҡаҙанған мәҙәниәт хеҙмәткәре, Баязит Бикбай исемендәге әҙәби премия лауреаты Зөһрә Ҡотлогилдина.

Миләүшә Саяғәфәр ҡыҙы 2023 йылдың декабрендә журналист коллегалары менән МХО биләмәһендә була һәм ошо командировка буйынса «Һуғышҡа ҡатын-ҡыҙ ҡарашы» тип аталған мәҡәләләр серияһын яҙа. “Яҙғандарымды халыҡ йылы ҡабул итте һәм улар буйынса бик күп хат-хәбәрҙәр алдым. Бер аҙҙан «Интеллигент» хикәйәһе тыуҙы, ул хәрби-патриотик темаға арналған әҙәби, музыкаль һәм һынлы сәнғәт әҫәрҙәре буйынса үткәрелгән республика конкурсында «Әҙәбиәт» номинацияһында икенсе урынды яуланы. Минеңсә, тап ошо сәбәптән минең тексымды һайлағандар”, – ти прозаик Миләүшә Ҡаһарманова.

Яҙыусы Зөһрә Ҡотлогилдинаның диктант өсөн Бөйөк Ватан һуғышында Еңеүҙең 80 йыллығына арналған «Беҙ – һуғыш балалары» тигән дүртенсе китабынан өҙөк алынған. Был текст башҡорт телен өйрәнә башлаусылар өсөн.

Диктантты ике форматта яҙырға мөмкин. 26 апрелдә

- М.Аҡмулла исемендәге Башҡорт дәүләт педагогия университеты,

- Өфө фән һәм технологиялар университеты,

- Башҡортостандың Мәғарифты үҫтереү институты,

- БР Милли музейы, БР Дәүләт Йыйылышы – Ҡоролтайы,

- Әхмәтзәки Вәлиди исемендәге Милли китапхана,

- Өфө күп профилле һөнәри колледжы,

- Өфө сауҙа-иҡтисад колледжы,

- Рәсәй Фәндәр академияһы Өфө федераль тикшеренеү үҙәгенең Тарих, тел һәм әҙәбиәт институты,

- Өфө ҡалаһы хакимиәтенең мәғариф идаралығы майҙансыҡтарында оффлайн яҙырға була. Ә 26-28 апрелдә онлайн форматта үтә. Дикторҙар менән тура эфир 26 апрелдә 11:00 сәғәттә Башҡортостан юлдаш телеканалында башлана.