Форумда меңгә яҡын кеше ҡатнашты

“Туғандар - яратҡандар” республика ата-әсәләр форумында меңгә яҡын кеше ҡатнашты. Ойоштороусыларҙың белдереүенсә, сара киләһе йылдарҙа ла үткәреләсәк. Форумдың тантаналы өлөшөн Рәсәй Федерацияһы Дәүләт Думаһы депутаты Зариф Байғусҡаров асты һәм күп бала тәрбиәләгән, әүҙем тормош алып барған, өлгөлө ғаиләләргә “Ил терәге” миҙалын һәм Рәхмәт хаттары тапшырҙы.

Ғаилә, хеҙмәт һәм халыҡты социаль яҡлау министры Линара Иванова, Башҡортостан Республикаһының Бала хоҡуҡтары буйынса вәкиле Ольга Панчихина, Башҡортостандың мәғариф һәм фән министры урынбаҫары Инесса Косолаповалар үҙ сығыштарында форумдың ғаилә ҡиммәтттәрен булдырыуҙа, һаҡлауҙа, үҫтереүҙә ҙур әһәмиәткә эйә булыуын билдәләне.