Үткәндәрҙән бөгөнгөгә

Кисә “Торатау” конгресс-холында башҡорт филологияһы фәненең 95 йыллығына һәм Өфө фән һәм технологиялар университетының Башҡорт филологияһы, журналистика һәм шәрҡиәт факультеты ойошторолоуға 35 йыл тулыу айҡанлы күркәм байрам сараһы үтте. Ул, ысын мәғәнәһендә, республикабыҙҙың төрлө төбәгенән ашҡынып килгән һабаҡташтарҙың күңел байрамына әйләнде.

Һис шикһеҙ, Башҡорт филологияһы факультеты республиканың мәғариф, фән, дәүләт, мәҙәниәт ойошмалары, тел, әҙәбиәт, фольклор, журналистика өлкәләре өсөн милли кадрҙар әҙерләү үҙәге булып тора. Бай үткәне, яҡты киләсәге бар уның. Бай йөкмәткеле концерт номерҙары менән үрелеп барған кисәлә үҙ эшенең оҫталары булған хеҙмәт алдынғыларына Хөкүмәт наградалары ла тапшырылды. Юғары кимәлдә ойошторолған сара матур сәй табыны менән тамамланды.