Яңы китап ҡотло булһын!

Шағирә, драматург, Шәйехзада Бабич исемендәге дәүләт йәштәр премияһы лауреаты, Башҡортостандың атҡаҙанған мәҙәниәт хеҙмәткәре Тәнзилә Дәүләтбирҙинаның "Уйлы заман" исемле өр-яңы китабы донъя күрҙе. Ошо уңайҙан кисә Зәйнәб Биишева исемендәге Башҡортостан “Китап” нәшриәте кибетендә бик матур сара үтте. Яңы ғына табанан төшкән китаптың исем туйына шағирәнең ижадын яратыусылар, ҡәләмдәштәре, дуҫтары һәм коллегалары йыйылды. Тәнзилә Сәлих ҡыҙы – егәрле ҡәләм эйәләренең береһе, ул шиғриәттә генә түгел, прозала ла, драматургияла ла ең һыҙғанып ижад итә.

Әҙибәне яңы китабы менән ҡотлап, Зәйнәб Биишева исемендәге "Китап" нәшриәте баш мөхәррире Зөлфиә Ҡарабаева, Башҡортостандың халыҡ шағиры Ҡәҙим Аралбай, халыҡ яҙыусыһы Марсель Сәлимов, яҙыусылар Гөлнур Яҡупова, Миләүшә Ҡаһарманова, Венер Исхаҡов, шағирәләр Тамара Искәндәриә, Зөлфиә Ханнановалар йөрәк түрендәге йылы хистәре менән бүлеште. Кисәне музыкаль яҡтан сихри ҡурай моңдары менән шағирәнең ҡустыһы Вилдан Дәүләтбирҙин биҙәне.

Күңелдәрҙе йылытыр, йәнле аралашыуға ҡоролған сара бер тынала үтеп тә китте. “Уйлы заман”ға үҙ уҡыусыһын табып, бәхетле яҙмыш юрайыҡ!