Тел биҫтәләре

Башҡортостанда Башҡорт телен һаҡлау һәм үҫтереү буйынса автономиялы коммерцияға ҡарамаған ойошма һәм «Мираҫ» йәштәр башланғыстарына ярҙам Фонды «Башҡортса интернет-серфинг» проектын ғәмәлгә ашыра.

Проектың “Тел биҫтәһе” тип аталған йүнәлеше 10 видеонан торған балалар контентын булдырыуҙы күҙ уңында тота. Әле интернет селтәрендә был яҙмалар киң популярлыҡ яулай. Унда 10 йәшкә тиклемге 11 бала Башҡортостандың атҡаҙанған артисы Шәһит Хамматовтың ҡатмарлы һорауҙарына ҡыҙыҡлы һәм тапҡыр яуап ҡайтара. Туған телдә иркен аралашҡан малай һәм ҡыҙҙар республиканың төрлө төбәгенән килгән, ойоштороусылар уларҙы илленән ашыу дәғүәсе араһынан һайлап алған.