“Башҡортостан – батырҙар ере” мемориаль үҙәге булдырылды

Өфөлә Һуҡырҙар өсөн республика махсус китапханаһында “Башҡортостан – батырҙар ере” тигән даими эшләүсе мемориаль үҙәк булдырылды. Унда Башҡортостандың ун геройы барельефы урынлаштырылған, тип хәбәр итәләр китапхананың социаль селтәрҙәге сәхифәһендә.

Уҡыусылар һәм үҙәккә килеүселәр, күреү һәләте буйынса инвалидтар өсөн Башҡортостан геройҙары биографияһы тураһында аудиойыйынтыҡ сығарылған. Текстарҙы махсус китапхананың тауыш яҙҙырыу студияһында профессиональ дикторҙар яҙҙырған. Шулай уҡ был тема буйынса рельеф-графика әсбабы ла донъя күргән.

Проект мәҙәниәт һәм сәнғәт өлкәһендә дөйөм милли әһәмиәттәге ижади проекттарҙы хуплау буйынса Рәсәй Президенты гранты ярҙамында ғәмәлгә ашырылған.

Фотолар Һуҡырҙар өсөн республика махсус китапханаһының социаль селтәренән.