Ғаилә юбилярҙары тәбрикләнде

Өфөнөң Октябрь районы ЗАГС-ында алтын туйҙарын билдәләгән ун ғаиләне тәбрикләү тантанаһы үтте. Юбилярҙарҙы тормоштарындағы иҫтәлекле көндәре менән район хакимиәте башлығы Сергей Плотников ҡотланы.

«Уларҙың иңгә-иң терәшеп ғүмер итеүҙәренә — 50 йыл, ул йылдар шатлыҡ-ҡыуаныстар, һынауҙар, һөйөү менән тулы. Һәр береһе матур тормош юлы үткән. Күҙҙәрендә һаман да саф мөхәббәт сатҡыһы һүнмәгән. Улар ныҡлы ғаилә ҡорған, балалар һәм ейән-ейәнсәрҙәр үҫтергән, хәҙер йәш быуын өсөн өлгө булып тора. Юбилярҙарҙы ихлас ҡотлайым һәм артабан бәхетле ғүмер кисереүҙәрен теләйем», — тине ул.

Илебеҙҙә иғлан ителгән Ғаилә йылында Өфөнөң Октябрь районында 50 йыл бергә йәшәгән 103 пар тәбрикләнде, тип өҫтәне район башлығы.

Сығанаҡ: «Башинформ».