Бөтә Рәсәй йәйәү йөрөү көнөндә 25 мең кеше ҡатнашты

Был акция Рәсәй Олимпия комитеты ҡанаты аҫтында үткәрелә. Быйыл ул тәүге тапҡыр “Рәсәй – спорт державаһы” халыҡ-ара форумы сиктәрендә үтте.

Программала флешмоб-күнекмә, 2024 метр оҙонлоҡтағы арауыҡты үтеү, концерт ҡаралған.

Спорт байрамында теләгән һәр кем ҡатнаша алды. Унда ҡала халҡы менән бер рәттән сәйәсмәндәр һәм олимпия чемпиондары ла ҡатнашты.

– Ваҡытым булғанда һәр саҡ йәйәү йөрөргә тырышам. Бынан бик ҙур ҡәнәғәтлек алам, сөнки хәрәкәт – ул тормош. Бөгөн “Рәсәй – спорт державаһы” халыҡ-ара форумы сиктәрендә сараға бик күп кеше килде. Беҙҙең мәғлүмәттәр буйынса, баш ҡала урамы буйлап 20 мең кеше үткән. Ә эргәлә 200 олимпия чемпионы – легендар шәхестәр булғанда – атлауы еңел һәм күңелле. Барығыҙға ла сәләмәтлек теләйем, – ти Башҡортостан Хөкүмәте Премьер-министры урынбаҫары вазифаһын башҡарыусы Ирек Сәғитов.  

– Йүгерергә яратмайым, төп стихиям – һыу, ә бына йөрөү – минеке. Көнөнә ун мең аҙым йөрөйөм. Өфөгә форумға килдем. Күп эштәр, осрашыуҙар булды. Барыһы ла уңышлы үтте. Башҡортостандың баш ҡалаһы таҙа, төҙөкләндерелгән булыуы, кешеләренең – киң күңелле, аш-һыуының тәмле булыуы менән хәтерҙә ҡалыр. Иҫтәлекле урындарҙы ҡарап өлгөрмәнем, шуға күрә йәнә киләм, – тип тәьҫораттары менән уртаҡлашты Рәсәй синхронисы һәм телевидение алып барыусыһы Алла Шишкина.

– Арауыҡ беҙ күҙ алдыбыҙға килтергәнсә ҡурҡыныс түгел ине. Финишта миҙал бирҙеләр – коллекциямда бындайҙың булғаны юҡ. Ә йөрөү – ул тәү сиратта файҙа. Бындай акциялар көс-дәрт бирә. Көслө һәм сәләмәт булыр өсөн йышыраҡ күнегегеҙ, һәр көнгә шатланығыҙ. Ҡаланан алған тәьҫораттарға килгәндә, өфөләр – алсаҡ һәм дуҫтарса мөнәсәбәттә. Халыҡ мине таный, киләләр, фотоға төшәләр – бик ҡыуаныслы. Бында ун йыл элек булғайным, шунан бирле мегаполис ярайһы үҙгәргән, – ти Рәсәй дзюдосыһы һәм самбисы, Рәсәй чемпионы, Европа кубогын яулаусы Тамерлан Башаев.

Александр Королев фотолары.