"Рәсәй - спорт державаһы" форумында ниндәй саралар үтә?

17-19 октябрҙә Өфөлә “Рәсәй – спорт державаһы” форумы үтә.

Башҡортостан Хөкүмәтендә форумда ниндәй саралар уҙасағы хаҡында ҙур һөйләшеү булды.

“Рәсәй – спорт державаһы” форумының төп майҙансығы итеп Көрәш һарайы билдәләнгән. Форум сиктәрендә Өфөлә – Фехтование үҙәген, Ишкәкле слалом комплексын, Нефтекамала «Амфибия» спорт үҙәген асыу планлаштырыла. Ишеү каналы Рәсәй йыйылма командаһы ҡатнашлығында слалом буйынса тәүге «Ҡурай төбәге» халыҡ-ара ярыштарын ҡабул итә. Был хаҡта «Рәсәй – спорт державаһы» халыҡ-ара спорт форумына әҙерлек һәм уны үткәреү буйынса ойоштороу комитеты ултырышында Рәсәй Хөкүмәте Рәйесе урынбаҫары Дмитрий Чернышенкоға Башҡортостан Премьер-министры вазифаһын башҡарыусы Андрей Назаров хәбәр итте.

   - Фехтование үҙәгендә юниорҙар араһында Халыҡ-ара «Салауат ҡылысы» турниры үтә. 17 октябрҙә “Өфө -Арена”ла “IBA чемпиондары төнө" профессиональ бокс кисәһе була. Унда континент чемпионы титулы өсөн донъяның иң көслө боксерҙары көрәшә. Бәләкәй аренала юниорҙар араһында Бөтә Рәсәй керлинг буйынса ярыштар ойошторола. “Динамо” спорт комплексында - “Динамо” һәм “ЦСП-Химки” клубтары араһында Рәсәй чемпионаты матчын, ә Спорт әҙерлеге үҙәгендә Рәсәй Паралимпия комитетының МХО ветерандары өсөн сараларын күрергә мөмкин. 25 мең самаһы кеше Бөтә Рәсәй Йәйәүлеләр көнөндә ҡатнашырға теләк белдерҙе, – тине Форум программаһы тураһында Андрей Назаров.

Вице-премьер Дмитрий Чернышенко ойоштороу комитеты ултырышында быйыл илебеҙ “Киләсәк уйындары”, “Азия балалары” һәм “БРИКС уйындары” кеүек ҙур халыҡ-ара ярыштар уҙғарыуын әйтеп китте һәм Рәсәйҙең күләмле саралар ойоштороу йәһәтенән лидерҙарҙың береһе булыуын билдәләне.

- Беҙ халыҡ-ара эксперт берләшмәһе менән спорт берләшмәләре һәм ярыштарҙың яңы форматтары булдырыу мәсьәләләрен тикшерәсәкбеҙ. Шулай уҡ Хөкүмәт бөгөн спорт йәмәғәтселеге менән берлектә ватан спортын үҫтереүҙең комплекслы дәүләт программаһын әҙерләй. Маҡсаттарҙы Президент Владимир Путин билдәләне: күберәк граждандарҙы даими спорт менән шөғөлләнеүгә йәлеп итеү һәм спортсыларыбыҙҙың әүҙемлеген арттырыу, – тип һыҙыҡ өҫтөнә алды Дмитрий Чернышенко.

  Форум программаһында  - түңәрәк өҫтәлдәр, пленар сессиялар, конференциялар, семинарҙар һәм дискуссия майҙансыҡтары. 15 мәҙәни сара, шул иҫәптән театр постановкалары, экспозициялар, күргәҙмәләр ҡаралған. Шулай уҡ ултырышта ҡатнашыусылар хәүефһеҙлекте тәьмин итеү, медицина һәм мәғлүмәт ярҙамы мәсьәләләрен тикшерҙе.

Рәсәй Президенты ярҙамсыһы Алексей Дюмин хәбәр итеүенсә, форумда дәүләт башлығы 2030 һәм 2036 йылға тиклем ҡуйған милли маҡсаттарға өлгәшеү өсөн аныҡ механизмдар һәм алымдар әҙерләргә кәрәк.

– Был ҙур дөйөм эштә дәүләткә ҡарамаған ойошмалар ҡатнаша ала һәм ҡатнашырға тейеш. Рәсәй Президенты ҡарамағындағы физик культураны һәм спортты үҫтереү буйынса советтың сираттағы ултырышында тап ошо хаҡта һүҙ барасаҡ. Ул 17 октябрҙә Өфөлә форум менән бер үк ваҡытта үтәсәк. Спортты үҫтереүҙә комплекслы ҡараш кәрәк. Һәм был форумдың пленар ултырышының төп темаһы буласаҡ, - тине Алексей Дюмин.

Хәтерегеҙгә төшөрәбеҙ, “Рәсәй – спорт державаһы” форумы 2009 йылдан алып уҙғарыла. Уны Ҡазан, Мәскәү, Саранск, Якутск, Чебоксар, Доброград (Владимир өлкәһе), Ульяновск, Түбәнге Новгород, Кузбасс һәм Пермь ҡабул итте.