Көҙгө йәрминкәгә килегеҙ!

13, 14 һәм 15 сентябрҙә Башҡортостандың 36 районы һәм ҡалаһында ауыл хужалығы йәрминкәләре үтәсәк, тип хәбәр итә Сауҙа һәм хеҙмәттәр министрлығының матбуғат хеҙмәте.

Йәрминкәләрҙә, ғәҙәттәгесә, республикабыҙҙа үҫтерелгән йәшелсә-емеш, үҙебеҙҙең етештереүселәр тәҡдим иткән тәбиғи аҙыҡ-түлек алырға мөмкин. Өс көндә, дөйөм алғанда, 57 сауҙа майҙансығы эшләйәсәк.

Мәҫәлән, Өфөлә ауыл хужалығы йәрминкәләре 14 һәм 15 сентябрҙә уҙасаҡ. Шәмбе көн улар Хәҡиҡәт урамы буйындағы автоюл участкаһында – Ухтомский урамынан Муса Йәлил урамына тиклем, Интернациональ һәм Машина төҙөүселәр урамдары киҫешкән урында, Спорт һарайы алдында, Орджоникидзе һарайы янында, Йәштәр һарайы эргәһендә, шулай уҡ Мушников урамы менән Баландин бульвары киҫешкән урында һәм Эшсе хәбәрселәр урамындағы 3-сө, 5-се, 7-се, 20-се йорттар эргәһендәге майҙансыҡтарҙа ойошторола.

Йәкшәмбе иһә сауҙа Интернациональ һәм Машина төҙөүселәр урамдары киҫешкән ерҙә, Спорт һарайы алдында, Мушников урамы менән Баландин бульвары киҫешкән урында һәм Эшсе хәбәрселәр урамындағы 3-сө, 5-се, 7-се, 20-се йорттар эргәһендәге майҙансыҡтарҙа дауам итәсәк.

Фото “Башинформ”дан алынды.