Республикала һайлаусыларға торт һәм туп бүләк итәләр

Стәрлетамаҡта бөгөн иртәнән үк һайлау участкаларына ғаиләләре менән тауыш бирергә киләләр.

Шуларҙың береһендә һайлаусыларҙы күңелле сюрприздар көтә. Урындағы хакимиәт хәбәр итеүенсә, «Стәрлетамаҡ-Арена» спорт һарайындағы һайлау участкаһында беренсе булып тауыш биргән ғаилә татлы бүләк — сәй һәм торт алып ҡыуанды. Ата-әсәләре менән килгән балаларҙы һауа шары һәм спорт тубы көтә.

Хәтерегеҙгә төшөрәбеҙ, бөгөн, 6 сентябрҙә, республикала Башҡортостан Башлығын һайлау башланды. Тауыш биреү 8 сентябргә тиклем бара. Башҡортостан һайлаусылары араһында «Рәхмәт» акцияһы ойошторола, унда 330-ҙан ашыу ҡиммәтле бүләк, шул иҫәптән фатирҙар, автомобилдәр һәм шифаханаларға юлламалар уйнатыла.

"Башинформ" мәғлүмәт агентлығы.