“Батарейкалар тапшырабыҙ” акцияһы үтә

Өфөлә, “Дим” мәҙәниәт һәм ял паркы биләмәһендә, 12-18 августа ҡулланыу мөҙҙәте сыҡҡан батарейкалар йыйыу буйынса “Батарейкалар тапшырабыҙ” экологик акция ойошторола.

Уның барышында эшлектән сыҡҡан батарейкаларҙан, электрон техниканан аккумуляторҙарҙан, пауэр-банктарҙан, кеҫә телефондары һәм башҡа мобиль электрониканан ҡотолорға мөмкин. 

Сара “Экология” милли проекты сиктәрендә уҙғарыла һәм ҡала халҡының тирә-яҡ мөхитте һаҡлау һәм тәбиғәткә һаҡсыл ҡараш мәсьәләләренә ҡыҙыҡһыныуын арттырыуға, ҡалдыҡтарҙы айырым йыйыу күнекмәләрен көндәлек тормошҡа индереүгә йүнәлтелгән.

Батарейкалар һәм башҡа электрон элементтар үлсәп 12-нән 16 сәғәткә тиклем атап үтелгән көндәрҙә ҡабул ителә. Акцияла ҡатнашыусылар араһында түбәндәге номинациялар буйынса конкурс уҙғарыла:

- 14 йәшкә тиклемге һәм унан олораҡ өфөлөләр;

- идара итеүсе компаниялар;

- күп фатирлы йорт советтары;

- предприятиелар хеҙмәткәрҙәре;

- мәғариф учреждениелары.

Еңеүселәр 30 августан да һуңға ҡалмайынса иғлан ителә. Уларға ҡиммәтле бүләктәр ҡаралған.

Йыйылған батарейкалар эшкәртеүгә оҙатыла.