Торлаҡ төҙөлөшө буйынса Башҡортостан алда бара

Бөгөн Рәсәй Хөкүмәте Рәйесе урынбаҫары Марат Хөснуллиндың Башҡортостан Башлығы Радий Хәбиров менән эшлекле осрашыуы үтте.

Уның барышында федераль үҙәктең республика менән үҙ-ара бәйләнеше, төбәк биләмәһендә күләмле проекттарға өҫтәмә ярҙам саралары тураһында эшлекле һөйләшеү булды.

Башҡортостан Башлығы вице-премьер Марат Хөснуллинға төҙөлөш, транспорт үҫешенә ярҙам өсөн рәхмәтен белдерҙе.

- Рәсәй Президенты, ил Хөкүмәте башланғысы менән булдырылған программалар һәм проекттар беҙҙең республика үҫешенә ыңғай йоғонто яһай. Башҡортостанда әле иҡтисади хәл тотороҡло, - тине Радий Хәбиров. – Төбәктә торлаҡ һәм юл төҙөлөшө йылдам бара. Былтыр 3,3 миллион квадрат метрҙан ашыу майҙанда торлаҡ сафҡа инде. 2030 йылға беҙ был күрһәткесте 4 миллион квадрат метр еткерергә ниәтләйбеҙ. Был маҡсатты ла үтәйәсәкбеҙ. Республика биләмәһендә М-12 федераль трассаһы участкаһын төҙөү проектын тормошҡа ашырыла. Уны 2024 йыл аҙағына тамамлау ҡаралған.

Рәсәй Хөкүмәте Рәйесе урынбаҫары Марат Хөснуллин Башҡортостанда төҙөлөш комплексын юғары баһаланы.

- Бөгөн Өфөлә күргәндәрем бик ыңғай тәьҫораттар ҡалдырҙы. Ҡалала йорттарҙың архитектураһы матур. Баш ҡаланың заманса яңы стиле барлыҡҡа килеүе һөйөнөслө. Торлаҡ төҙөлөшө күләме буйынса Башҡортостан алдынғы ун төбәк иҫәбенә инә. Йылдан-йыл был күрһәткес арта. Юл инфраструктураһы үҫеше буйынса ла төбәк “Сифатлы хәүефһеҙ юлдар” милли проектының планын уңышлы үтәй, - тине ул.