Өфөлә “Башҡортостан” дәүләт концерт залында 13 тапҡыр Паралимпия чемпионкаһы Рима Баталованың X “Милләт йәшлеге” ижтимағи премияһына лайыҡ булыусыларҙы тәбрикләү тантанаһы уҙҙы. Был премия менән һаулыҡ мөмкинлектәре сикләнгән йәш спортсылар һәм уларға уңыштарға өлгәшергә ярҙам иткән тренерҙар һәм ата-әсәләр бүләкләнә. Сағыу ваҡиға булараҡ танылған был сара республикабыҙҙа ғына түгел, бөтә илдә йылдан-йыл ҙурыраҡ абруй яулай.
– 10-сы – юбилей премияһының тап Һаулыҡ мөмкинлектәре сикләнгән кешеләр хаҡында хәстәрлек йылы тип иғлан ителгән йылда тапшырылыуы айырыуса әһәмиәткә эйә. Премияның һәр еңеүсеһе – буласаҡ Паралимпия чемпионы. Ошо мөһим сара Башҡортостандың спорт ҡаҙаныштары һәм Паралимпия чемпиондары төбәге булыуын йәнә бер тапҡыр раҫлай, – тип билдәләне Башҡортостан Республикаһы спорт министры Руслан Хәбибов.
“Милләт йәшлеге” премияһы лауреаттары тип түбәндәгеләр иғлан ителде:
“Чемпион тәрбиәләү” номинацияһында – Миәссәровтар ғаиләһе;
“Йыл асышы” номинацияһында – коляскалағы тенниссы Дарья Сивкова;
“Паралимпия спортының өмөтө" номинацияһында – Бөтә Рәсәй Паралимпия ярыштары призеры һәм еңеүсеһе Ангелина Дьяченко;
“Сиге булмаған спорт” номинацияһында – еңел атлеттар Әмирйән Холматов һәм Алһыу Сәғетдинова, дзюдосы Әҙилә Әбсәләмова.
Бынан тыш, премияға йәш спортсылар менән шөғөлләнеүсе педагог-тренерҙар, паралимпия спортын үҫтереүгә үҙ өлөшөн индергән компаниялар, республикала паралимпия хәрәкәтен, инвалидтар проблемаларын әүҙем яҡтыртыусы киң мәғлүмәт саралары ла лайыҡ булды.
Фото: “Кызыл таң” гәзите сайтынан.