БР Яҙыусылар союзы ойошторған “Заман ауазы” патриотик әҫәрҙәр конкурсының еңеүселәре билдәләнде

Бөгөн Өфө фән һәм технологиялар университетында Башҡортостан Республикаһы Башлығы фонды грантына БР Яҙыусылар союзы ойошторған “Заман ауазы” патриотик әҫәрҙәр конкурсының еңеүселәре билдәләнде “Шиғриәт” номинацияһында беренсе урынды “Халҡым минең – Ватаным!” шиғырҙар циклы өсөн Лариса Абдуллина яуланы һәм 150 меңлек сертификат менән бүләкләнде. Икенсе урынға һәм 100 мең һумлыҡ аҡсалата бүләккә “Блокада” поэмаһы авторы Зөһрә Ҡотлогилдина лайыҡ булды, өсөнсө урын һәм 50 меңлек сертификат иһә - «Есть на свете такая страна…» шиғырҙар циклы өсөн Александр Хватковҡа бирелде.

“Ҙур күләмле проза” номинацияһында 1 урынға һәм 200 меңлек сертификатҡа “Мәскәү ҡыҙы” романы өсөн Мәүлиҙә Әхмәтйәнова лайыҡ булды. 2 урын һәм 150 меңлек сертификат “Сал сәсле малай” повесы өсөн Гүзәл Ситдиҡоваға бирелһә, 3 урын һәм 100 меңлек аҡсалата бүләк "Патриот бабай” әҫәре авторы Айбулат Сәсәнбаевҡа тапшырылды.

“Бәләкәй күләмле проза”ла 1 урын һәм 150 меңлек сертификат “Аманат” хикәйәһе өсөн Миләүшә Ҡаһармановаға бирелде, 2 урынға һәм 150 меңлек сертификатҡа “Еңеү ҡанаттары" әҫәре авторы Фәрзәнә Аҡбулатова лайыҡ булды. 3 урынды һәм 50 меңлек сертификатты “Геройҙар ваҡыты”хикәйәһе өсөн Зөлфирә Ҡаҙаҡбаева яуланы.

“Балалар өсөн иң яҡшы әҫәр” номинацияһында 1 урынға һәм 150 меңлек сертификатҡа “Еңеүҙе яҡынайтабыҙ” шиғырҙар циклы өсөн Рәмзәнә Абуталипова лайыҡ булды.