"Кеше булып йәшәү өсөн, кеше кешегә кәрәк!.."

14 февралдә Әхмәтзәки Вәлиди  исемендәге Милли китапханала  «Башҡортостан ҡыҙы» журналының баш мөхәррире, Шәйехзада Бабич исемендәге дәүләт республика йәштәр премияһы лауреаты, Башҡортостандың атҡаҙанған матбуғат һәм киң мәғлүмәт саралары хеҙмәткәре, журналист һәм талантлы шағирә Гөлназ Ҡотоеваның “Кеше булып йәшәү өсөн, кеше кешегә кәрәк!” тип исемләнгән әҙәби-музыкаль кисәһе үтте.

Сарала шағирәнең ижадын һөйөүселәр, юғары уҡыу йорттары студенттары, хеҙмәттәштәре, ҡәләмдәштәре ҡатнашты. БР Дәүләт Йыйылышы – Ҡоролтай депутаты, БР Яҙыусылар союзы рәйесе Айгиз Баймөхәмәтов, уның урынбаҫары, шағирә Тәнзилә Дәүләтбирҙина, “Башҡортостан ҡыҙы” журналының элекке баш мөхәррирҙәре, Башҡортостандың халыҡ яҙыусыһы Гөлфиә Юнысова һәм билдәле шағирә Йомабикә Ильясова, БР Милли әҙәбиәт музейы директоры Миләүшә Ҡаһарманова, Өфө лимонарийы етәксеһе, танылған селекционер, биология фәндәре кандидаты Фәриҙә Садыҡова һәм башҡалар,  юбилярҙы ҡотлап, иң йылы теләктәрен еткерҙе.

Кисә шул тиклем матур форматта үтте. Һәр ҡатнашыусы Гөлназ Ҡотоеваның шиғырҙарын уҡып, күңел хәтирәләре менән бүлеште, шағирәнең тормош юлын байҡап, йөрәк серҙәрен асты. Йылылыҡҡа, ихласлыҡҡа ҡоролған кисәнең авторы һәм алып барыусыһы Мәҙинә Муллабаева ҡунаҡтар күңеленә асҡыс табып, наҙ ипкене бөрктө. Бай йөкмәткеле әҙәби сараны хисле йыр-моңдары менән Мәскәү ҡунаҡтары – билдәле йырсылар Арсен һәм Луиза Кәримовтар, виртуоз саксофонсы Радель Дияс, шулай уҡ сағыу тауышлы һәүәҫкәр йырсы Данис Аллағыуатов биҙәне.

Меңдәр күңелендә ауаздашлыҡ тапҡан илаһи яҙмаларың, хисле шиғырҙарың киләсәктә лә әҙәбиәт һөйөүселәрҙе ҡыуандырһын, Шағирә!