Торлаҡ төҙөлөшө арта

Башҡортостанда 2023 йылдың 11 айында 2,79 миллион квадрат метр торлаҡ сафҡа индерелгән, тип хәбәр итәләр Федераль дәүләт статистикаһы хеҙмәтенән.

Күрһәткес уҙған йылдың ошо уҡ осоро менән сағыштырғанда 4 процентҡа юғарыраҡ. Башҡортостан Республикаһы Хөкүмәте Премьер-министры Андрей Назаров белдереүенсә, быйылғы йыл йомғаҡтары буйынса 3 миллион квадрат метрҙан ашыу торлаҡты сафҡа индереү күләменә сығыу мөмкинлеге бар.

Ғинуар-ноябрь айҙарында шәхси төҙөлөштөң дөйөм майҙаны 1,84 миллион квадрат метр тәшкил иткән. Был – дөйөм майҙандың 65,9 проценты.

Торлаҡты сафҡа индереү күрһәткесе буйынса Башҡортостан Республикаһы Рәсәй Федерацияһы төбәктәре араһында 8-се, Волга буйы федераль округы төбәктәре араһында 2-се урынды биләй.