Яңы йыл төнөндә автобустар икегә тиклем йөрөй

Республиканың транспорт һәм юл хужалығы министры Александр Клебанов белдереүенсә, Башҡортостанда Яңы йыл төнөндә йәмәғәт транспорты төнгө сәғәт икегә тиклем маршруттарҙы хеҙмәтләндерә.

31 декабрҙә киске сәғәт 10-дан ҡала һәм район байрам майҙансыҡтарына тиклем автобустар 15-20 минут ара менән йөрөйәсәк.

Дөйөм алғанда, 30 декабрҙән 8 ғинуарға тиклем пассажирҙар транспорты ял көнө теҙмәһе буйынса эшләй. Өфө һәм Стәрлетамаҡ агломерацияларында автобустар иртәнге сәғәт 8-ҙән киске 8-гә тиклем йөрөй. Шул уҡ ваҡытта ҡала-ара маршруттар буйынса рейстар ғәҙәти режимда башҡарыласаҡ.