Башҡортостан парламентының КПРФ фракцияһы етәксеһе Юнир Ҡотлоғужин вазифаһын ҡалдырҙы

Башҡортостан Дәүләт Йыйылышы-Ҡоролтайҙың КПРФ фракцияһы етәксеһе Юнир Ҡотлоғужин вазифаһын ҡалдырҙы.

КПРФ-тың республика комитеты хәбәр итеүенсә, депутат етәкселектән үҙ теләгенә һәм КПРФ-тың Үҙәк Комитеты рәйесенең беренсе урынбаҫары Юрий Афониндың яҙма тәҡдименә ярашлы киткән.

«Мин Үҙәк Комитеттың тәҡдимен хупларға булдым һәм фракциялағы коллегаларымды ла шулай эшләргә саҡырҙым. Башҡортостан Дәүләт Йыйылышы — Ҡоролтайға тәҡдим иткән һуңғы проектыбыҙ тирәләй хәлде тәрәнгә ебәрмәҫ өсөн фракция етәксеһе вазифаһын ҡалдырырға һәм иғтибарымды КПРФ-тың республика комитетында эшкә тупларға  хәл иттем», — тип белдерә Юнир Ҡотлоғужин.

Республика парламентының коммунистар фракцияһы етәксеһе вазифаһын Ҡотлоғужин урынына Башҡортостан Дәүләт Йыйылышы вице-спикеры Вадим Старов биләне.