Уңыштар һиңә, абитуриент!

Башҡортостандың юғары уҡыу йорттарында абитуриенттарҙан документтар ҡабул итеү кампанияһы башланды. Башҡортостан Башлығы Радий Хәбиров социаль селтәрҙәге сәхифәһендә абитуриенттарға уңыштар һәм һайлаған университеттарына уҡырға инеүҙәрен теләне.

«Йылдан-йыл күберәк йәштәребеҙ бушлай юғары белем алһын өсөн маҡсатлы рәүештә эш алып барабыҙ. Быйыл республика университеттарында 14 886 бюджет урыны бар (2022 йылға ҡарағанда 512-гә күберәк).

Бөгөн беҙҙең юғары уҡыу йорттары баш ҡаланыҡылар менән конкурентлыҡ итергә һәләтле. Был йәһәттән республикала уңышлы эшләүсе Евразия ғилми-белем биреү үҙәгенең өлөшө ҙур. Башҡортостан университеттары «Өҫтөнлөк-2030» федераль программаһында ҡатнаша. Өфө фән һәм технологиялар университетында алдынғы инженерлыҡ мәктәбе уңышлы эшләп килә.

Нефть университетындағы стартап-студия һәм индустриаль партнерҙар менән әүҙем эш итеү һөҙөмтәһендә Башҡортостан – студенттарҙың хупланған стартап-проекттары буйынса алдынғы урындарҙа. Беҙ фән лидерҙарын үҫтерәбеҙ – студенттарыбыҙ яңы идеяларҙы сәнәғәткә әүҙем индерә.

Һәләтле йәштәрҙе финанс яҡтан дәртләндерәбеҙ. Беҙҙең университеттарҙа олимпиадаларҙа еңеүселәр һәм берҙәм дәүләт имтиханында юғары балл йыйғандар өсөн юғары стипендия ҡаралған», –  тип яҙа республика етәксеһе.

Сығанаҡ: «Башинформ».