«Китап байрамы» сиктәрендә Бөтә Рәсәй сәсәндәр фестивале ойошторола

27 майҙа «Китап байрамы» халыҡ-ара китап йәрминкәһе барышында халыҡ ижадын популярлаштырыуға, Рәсәй халыҡтарының эпик жанрын үҫтереүгә һәм таратыуға, үҙебеҙҙең һәм сит ил сәсәндәре менән ижади бәйләнештәр булдырыуға, Башҡортостандың, Рәсәйҙең, сит ил халыҡтарының күп милләтле мәҙәниәте һәм традициялары менән таныштырыуға йүнәлтелгән Бөтә Рәсәй сәсәндәр фестивале уҙғарыласаҡ. Был хаҡта республика Мәҙәниәт министрлығының матбуғат хеҙмәтендә хәбәр иттеләр.

Рәсәй төбәктәренән килгән йыраусылар М.Аҡмулла исемендәге Башҡорт дәүләт педагогия университеты алдындағы майҙанда ҡоролған тирмәлә сығыш яһаясаҡ. Саха (Яҡут), Дағстан, Марий Эл, Алтай республикаларынан, Силәбе һәм Ырымбур өлкәләренән, Мәскәүҙән, Дондағы Ростовтан ҡунаҡтарҙың, Башҡортостандың муниципаль берәмектәре вәкилдәренең килеүе көтөлә.

Фестиваль барышында сәсәнлек буйынса оҫталыҡ дәрестәре, Башҡортостандың һәм Рәсәйҙең сәсәнлек мәктәптәре менән таныштырыу, донъя халыҡтарының эпик әҫәрҙәрен башҡарыусыларҙың «Ҡобайыр-шоу» концерты, Рәсәйҙең танылған сәсәндәре, республика ғалим-фольклорсылары, Башҡорт дәүләт педагогия университеты, Рәсәй Фәндәр академияһы Өфө федераль тикшеренеү үҙәгенең донъя эпостарын өйрәнеүселәр ҡатнашлығында «Милли сәсәнлек мәктәптәре: эшмәкәрлек алымдары һәм перспективалары» темаһына түңәрәк өҫтәл буласаҡ.

Республиканың киң мәғлүмәт саралары журналистары өсөн теле- һәм радиобрифингтар, башҡорт эпостары, әкиәттәре, легендалары буйынса фильмдар, йәнһүрәттәр, видеофильмдар күрһәтеү, Өфө буйлап этно-тур ҡаралған.

Сараны Башҡортостандың Мәҙәниәт министрлығы, Республика халыҡ ижады үҙәге, Сәсәндәр үҙәге ойоштора.

Сығанаҡ: "Башинформ".