Йоғошло сирҙәрҙе профилактикалау аҙналығы бара

20 марттан 26 мартҡа тиклем Рәсәйҙә йоғошло сирҙәрҙе профилактикалау аҙналығы үткәрелә, тип хәбәр итә Башҡортостан Һаулыҡ һаҡлау министрлығының матбуғат хеҙмәте. Ул 24 мартта Бөтә донъя туберкулезға ҡаршы көрәш көнөн уҙғарыу айҡанлы ойошторола.

Туберкулез – башлыса үпкәне зарарлаусы микобактериялар тыуҙырған йоғошло сир. Ул үпкәгә генә түгел, лимфа системаһына, һөйәккә, быуындарға, бәүел-енси ағзаларға, тирегә, күҙҙәргә, нервы системаһына ла зыян килтереүе мөмкин.

Йоғошло ауырыуҙарҙы зарарлы микроорганизмдар тыуҙыра һәм сир сырхауҙан сәләмәт кешегә күсеп тарала.

              Йоғошло сирҙәрҙе йоҡтороуҙың төп юлдары:

1. Һауа-тамсы юлы. Грипп, киҙеү, коклюш, туберкулез, һыу сәсәге, дифтерия, ҡыҙылса һымаҡ сирҙәр тап шулай күсә. Һаҡланыу өсөн битлек кейеү, бүлмәләрҙе елләтеп тороу, бинала күп халыҡтың йыйылыуына юл ҡуймау кәңәш ителә.
2. Йыуылмаған емеш-еләк, инфекция эләккән ризыҡ, бысраҡ ҡулдар аша. Шул рәүешле йоҡҡан эсәк инфекцияларын, сальмонеллезды, дизентерияны, вируслы А гепатитын иҫкәртеү өсөн шәхси гигиенаны күҙәтеү, ҡулдарҙы йыш йыуыу, емеш-еләкте яҡшылап йыуыу зарур. Шулай уҡ бүлмәләрҙә себен булмауы ла бик мөһим.
3. Енси юл менән. Был юл аша йоғоусы вируслы В һәм С гепатиты, ВИЧ-инфекция кеүек сирҙәрҙе эләктермәү өсөн барьер һаҡланыу сараларын файҙаланырға кәрәк.
4. Ҡан аша. Хирургия инструменттарының стериль булыуы, татуировка эшләтеүҙән баш тартыу (бигерәк тә өй шарттарында) ҡан аша йыш күсә торған вируслы В гепатитынан, ВИЧ-инфекциянан һаҡланырға ярҙам итер.

Йоғошло сирҙәрҙе иҫкәртеү шәхси (вакцинация, гигиена ҡағиҙәләрен үтәү, сынығыу, сәләмәт йәшәү рәүеше алып барыу) һәм дөйөм профилактиканы (производствола хәүефһеҙ хеҙмәт, көнкүреш шарттары булдырыу) үҙ эсенә ала.

Фото БР Һаулыҡ һаҡлау министрлығы сайтынан.